ഡോർസെറ്റ് കേരള കമ്മ്യൂണിറ്റിയുടെ കായിക മേള - 2015 മെയ് 9 ന് ബ്രങ്ക്സം മൈതാനത്ത് വച്ച് മേളയുടെ മുഖ്യ സംഘാടകൻ ശ്രീ ബിനോയ് മുട്ടാറിന്റെ നേതൃത്വത്തിൽ നടന്നു. ആവേശത്തോടും മത്സര ബുദ്ധിയോടും കൂടി അംഗങ്ങൾ രാവിലെ തന്നെ മൈതാനത്ത് എത്തി പരിശീലനം നടത്തുന്നത് കാണാമായിരുന്നു.
മെയ് 9 ന് രാവിലെ പത്തു മണിക്ക് ഡോർസെറ്റ് കേരള കമ്മ്യൂണിറ്റി പ്രസിഡന്റ് ശ്രീ ഷിബു ഫെർണാൻഡസ് മറ്റു ഭരണ സമിതി അംഗങ്ങളുടെ സാന്നിധ്യത്തിൽ കായിക മേള 2015 ഉദ്ഘാടനം ചെയ്തു.
വിജയികൾ യുക്മ റീജിയണൽ കായിക മേളയിൽ പങ്കെടുക്കേണ്ടത് കൊണ്ട് തന്നെ മത്സര ഇനങ്ങളും അതിനനുസരിച്ചുള്ള നിയമങ്ങളും പാലിക്കുവാൻ സംഘാടകർ പ്രത്യേകം ശ്രദ്ധിക്കുക ഉണ്ടായി. ജൂനിയർ, സബ് ജൂനിയർ, സീനിയർ, സൂപ്പർ സീനിയർ എന്നി വിഭാഗങ്ങളിൽ 50 മി, 100 മി, 200 മീറ്ററിൽ ഓട്ട മത്സരവും ഒപ്പം റിലേ മത്സരവും സംഘടിപ്പിച്ചു.
കൂടാതെ ഹൈ ജമ്പ്, ലോങ്ങ് ജമ്പ്, ഫുട്ബാൾ മത്സരവും നടത്തി. ഉച്ച ഭക്ഷണവും ലഘു ഭക്ഷണവും പ്രോത്സാഹനമായി അംഗങ്ങൾക്ക് സംഘാടകർ ഒരുക്കിയിരുന്നു. പുരുഷ ചാമ്പ്യനായി ഡാനി സാബുവും വനിതാ ചാമ്പ്യനായി അലീന തോമസ്സും, ഡിയോണ് ഡാന്റോ ക്യാപ്റ്റനായുള്ള ഫുട്ബാൾ ടീം കിരീടം കരസ്ഥമാക്കി. വൈകിട്ട് അഞ്ചു മണിയോടെ കായിക മേള സമാപിച്ചു .ഡി കെ സി സെക്രട്ടറി ശ്രീ ജോസ് ആന്റോ നന്ദി പറഞ്ഞു.